ملت نئجه تاراج اولور اولسون
ملت نئجه تاراج اولور اولسون نه ایشیم وار !
دشمنلره محتاج اولور اولسون نه ایشیم وار !
سس سالما یاتانلار آییلار قوی هئله یاتسین
یاتمیشلاری راضی دگیلم کیمسه اویاتسین
تک-تک آییلان وارسا دا حق دادیما چاتسین
من سالیم اولوم جمله جهان باتسا دا باتسین
ملت نئجه تاراج اولور اولسون نه ایشیم وار !
دشمنلره محتاج اولور اولسون نه ایشیم وار !
سالما یادیما صحبت تاریخ جهانی
ایام سلفدن دیمه سؤز بیرده فلانی
حال ایسه گتور میل ائلیوم دولمانی نانی
مستقبلی گؤرمک نه گرک عمردور فانی
ملت نئجه تاراج اولور اولسون نه ایشیم وار !
دشمنلره محتاج اولور اولسون نه ایشیم وار !
اولاد وطن قوی هئله آواره دولانسین
چیرکاب سفالتله الی باشی بولانسین
دول عورت ایسه سائله اولسون،اودا یانسین
آنجاق منیم آوازه شأنیم اوجالانسین
ملت نئجه تاراج اولور اولسون نه ایشیم وار !
دشمنلره محتاج اولور اولسون نه ایشیم وار !
هر میلت ائدیر صفحه ی دنیاده ترقی
ایلر هره بیر منزل ماواده ترقی
یورغان دوشه گیمده دوشه گر یاده ترقی
بیزده ائده ریک عالم رویاده ترقی
ملت نئجه تاراج اولور اولسون نه ایشیم وار !!!
دشمنلره محتاج اولور اولسون نه ایشیم وار !!!
میرزه علی اکبر صابیر
