نؤقطه‌لی ویرگول
"نؤقطه‌لی ویرگول"
بؤیوک حکیم جاواد هیئت عؤمرونون سون آی‌لاریندا بیر کیتاب اوزه‌رینده ایشله‌ییردی. ائله محض او زامان‌لار اونون گونده‌لیک زیارتی منه قیسمت اولدو. باکیدا ایکی اوچ آی سورن بو گؤروش‌لرین آماجی حکیمین حاضیرلادیغی برتراند راسل‌ین "غرب فلسفه تاریخی"نین رئداکته‌سی ایدی. آذربایجان جومهورییتی بیلیم‌یورد‌لاری‌نین بیری بو ایشی منه تاپشیرمیشدی. بو گوروش‌لرده من حکیمدن دفعه‌لرله خاطیره‌لرینی قلمه آلماسینی ریجا ائتدیم. چونکو او، عؤمرو بویو کیم‌لیک‌چی سیاستین آپاریجی سیمالاریندان اولموشدو. هانسی‌سا سببدن آسیلی اولاراق حکیم بونا بویون قویمادی. ایندی ایسه بیلمیرم حکیمدن ائله بیر یازی‌لار یادیگار قالیب یوخسا یوخ؟
بو چوخ اؤنملی بیر مسئله‌دیر. هر کس زامان آخاریندا اوینادیغی رولا اویغون اولاراق بئله بیر گیریشیمده بولونارسا، تاریخین قارانلیق بوجاق‌لارینا آیدینلیق گتیره بیلر. بونلاری گوز اؤنونه آلاراق، یوزلرله صحیفه اوتوبیوگرافیک جیزماقارالاریمی بو گون ساهمانا سالماغا باشلادیم. اوزون بیر ایش اولدوغوندان بو یاخین‌لاردا اونون بوراخیلیشینی دوشونمورم. البته سانال اورتامدا [مجازی فضادا] بو یازی‌لاردان بعضی فراگمئنت‌لر ایشیق اوزو گؤره بیلر.
اوتوبیوگرافیده ماراقلی قونولار چوخ‌دور. اؤرنه‌یین، "یول" درگیسی گئرچک آنلامدا تاریخی اولای ایدی. اونون قالماقاللی نشری، آرخا پلانی، اوزه‌رینده‌کی باسقی‌لار، رقابت‌لر و أمکداش‌لارین بؤیوک أمه‌یی اونودولمامالی‌دیر. اوندان نئجه و نییه اوزاقلاشدیغیم بیله، اوخوجولار اوچون ماراقلی گؤرونه بیلر. "یول"دان "جاهان" درگیسینه و اوندان دا "یارپاق" قزئتینه آدلاییشیم، اوغورلارا کؤکلندی، یانلیشیق‌لار و یئنیلگی‌لرله مشایعت اولوندو. ألبته یولدان اؤنجه یاشادیغیم ده‌یرسیز گون‌لره ده قیساجیق توخونموشام. بو اوزون یولچوغون حئکایه‌سینه هله‌لیک "نؤقطه‌لی ویرگول" آدینی سئچمیشم.
"نؤقطه‌لی ویرگول" کوسکون بیر دئوریمچی‌نین تکجه گونده‌لیک آنی‌لاری دئییل. بللی بیر دؤنمین اولای‌لارینی یاخیندان ایزله‌میش اینسانین دونیایا باخیش پنجره‌سی‌دیر. بو اینسان، بعضن بو اولای‌لارین جانلی تانیغی [شاهیدی] اولموش، بعضن ده دییشیم فیرتاسیندا اؤزنه [فاعل] کیمی چیخیش ائتمیشدیر.
یازار : ایواز طاها
