قوشلار

قوشلار
خوش سسیله یوخودان اویاندیم، دئیسن باشیمین اوسته بیری اوخویور.
هر نقدری اوج آلا بو سینه ده داغین سنین
یوز برابر اولموشام من ایندی مشتاقین سنین
گوجن گؤزلریمی آچدیم،باشیم اوستکی ساعات منه گؤز ووروپ اللریلن ۶ خانیمی گؤرسدیردی.
پنجره یه باخچاغین گؤردوم بیر آریغ،جوان یاکریم اوتوروپ طاقچادا جیب تلفونویلا دانیشیر و هردن عالیموف تکی سسین آلیر باشینا اوخویور. دئین بیر قادینلا دانیشیر و اونون نازینی چئکیر،جوانین دانیشیغیندان معلومدو بیر اصلی تک گؤزله وورولوپ، تلفون دالینداکی قادینا آدرسی وئریپ دئدی:” تئز دور گل بورا بیر قشنگ حیط تاپمشام سنه،بیزیم عشقیمیزن گونو بو حیطدن چیخیپ،دونایا ایشیق سالاجاغ.”
تلفونو قطع ائلییپ بیر نئچه دقیقه دن سورا گؤردوم بیر گؤزل یاکریم قوش گلدی طاقچادا اوتدو.
ارکک قوش دئدی:”نئجه دی ؟ خوشان گلدی؟” خانم دئدی:”اوتانمیسان منه دئییسن گل سنه حیط تاپمیشام ؟ اؤزوده هاردا ؟ فرودگاه !!! ای سنین کول باشیواتللی،آی داش باشیوا تللی، من نئجه قرا بختم، منیم باجیم توی ائیلدی گئتدیلر شهرکه، خالام قیزی نامزد ائیلییپ اری ایندیدن انصاریه ده اونا بیر آختالادومان آلیپ… من نئجه قرا بختم، گؤرک گئدم خالخین شئه لی طاقچاسیندا اوتوروپ یومورتدویام،یانیم بوزلویا روماتیسم توتوپ اوشاغلاریمدا بوردا دونیایا گتیرم… بونلاری دئدی دالین چویوردی،ارکک گه طرف قنتلرین یئتیم اوشاغ تک ساللادی.
ار دئدی: “الله سنین ننن دن گئچمسین او سنی گینه دولدوروپ،منیم بو پولومدان بوردان یاخچی یئر تاپا بیلمریک، الله شاهید دی اگر گؤیلرین یولو آچیلسیدی هر یئره اوچا بیلسیدیک،سنی زنجاندا کی یوخ، گؤتورردیم آپاراردیم یئنی دونیادا قوشلار وادی سینده ساکین اولاردیخ اورداکی هر ذاتدان باش عدالتدی، اؤزون بیلیسن من سنی هر ذاتدان چوخ ایستیرم…”
ار بو سؤزلریلن خانیمین یوموشاتدی اونون بوینون دوملوگویلن قیدیخلادی دئدی گئچ گئدک بیرآز دولاناخ، آداخلیسی دئدی:” قارداشلاریم آتام منی سندن گؤرسه، سنین دَریوَه دوز دؤلدورار،اولسا گئدک بیر کافی شاپدا میلچک بستنی سی یئیک”. بو سوزلری دانیشا دانیشا قوشلار گئتدی.

ساعات باجی منه بوزاریپ ۷ نی گؤرسدیردی.
بیردم تلفونوم قیشقیردی “وای وای یاندیم”، “وای وای یاندیم”، تلفونو آچدیم:”مشترک شماره… قسط شماره… شما…،آخرین فرصت تصویه حساب امروز میباشد، در صورت عدم تسویه مبلغ…ازضامن کسر خواهد شد”. تلفونو اوزاتدیم یئره الیمی چکدیم تلفونون اوزونه دیدیم:”منی ده یاندیردی بو سؤز. اوزوم سنین یانیندا قره دیر.باغشلا منی،فقط وای خبری گلیر سنه”.
اوتوردوم کامپیوتر دالیندا دونیام چوریلدی هر شی ۰ و ۱ اولدو،منده یارادیردیم، یاراتدیغلاریما یئتیشیردیم، بیرینه ال،بیرینه قول،بیرینه ایش بیرینه مال، من کُدچویام، کُدلار اللهی،نه آی بؤلونوپ منیم دونیامدا نه چای، منیم دونیامدا عدالتیلن چؤرک بؤلونوپ،آج گؤرمزسن.
یازیردیم کی گینه قوشلارین سسی گلدی،اوتورموشلار پرده نین آقاجی اوسته دانیشیللار، کیملری چاغیراغ تویا ؟کیملری چاغیرمیاغ ؟ تویانا آلاخ؟ آلمیاخ؟بیردن قوش خانم اوجا سسیله دئدی:”من توی گونو باش آچیخ دولاناجامها!،لباس عروس ایچینده ایستیرم هاممی منه باخسین،مندن خوشگول قوش دونیایا گلمئییپ گلمئیجک،دئدی فیلان ماشین،فلان تالار،فلان جور میلچکلر منیم تویومدا گؤرک اولا،اوغلان باشین سالدی آشاغی دئدی:”سنین بو سوزلرین بو توقعاتین،من کی هئچ رئیس بانک فیلان دا،او فیشلریلن ائدمز”.
گینه داوا باشلاندی، یانلارین توتدولار بیربیرینه سسلری اوجالدی…
قوش خانیم دئدی:” صبح ساعت ۵ دن دورا جاغسان گئدن کوچلردن چؤرک یغیشدیران گتیرن،هله بیلینمیر ایت توتا بیلن، پیشیکلر سیفراسیندا کباب اولان،اداملار وورالار، غارقالار توتا، بیمه ده کی یوخون، ثابت ایشین ده کی یوخ، اوچماغاداکی قویموللار،من سنین نمه ین اورک باغلییم؟” حیرصیله ارینین قنتینه ووروپ منی گؤرستدی دئدی: “هله ده منه دئییسن گل بو ائوده قال، بیر ائو ده کی بیر مجرد اوغلان وار، کیشی سنده غیرت یوخ؟ سنین غیرتین قبول ائیلیر سن ایشه گئدندن سورا من بو اوغلانین یانیندا تک قالام ؟ ”
ارکک قوش اوجا سسیله دئدی: “بو بئچارا اوغلانین قنتی یوخ اوچا، بو اگر سنه یان باخسا اؤزوم گؤزلرینی دوملوک لویوپ اوزونو جیرماخلارام. آندان مگر گورمورن اوتوروپ توئوخلار تکی بارماخلارین اوینادیر، بیر باخ اونا !
ارکک منی گینه گورستدی خانمینا دئدی:”گویلون ایستیردی ارین بوجور بیر اوغلان اولسون ؟ سنه هئچ توجه ائیلمه سین؟ سنه ترانه اوخومویوپ نازین چئکمه سین،فقط کتابلار ایچینده دولانسین؟ دوملوگو یوخ سنه غذا وره،اتلی اتلی قورداخ گتیره، سنی قَشو لویا، هله پیس پیس بیزه ده باخیر .
هوی اوغلان گللم ایشرم کیتابلارین اوستونه ها بیزه نیه باخیسان ؟ ”
قوش خانم کوسدو،آغلیا آغلیا گئتدی،مندن ارکک قوش تک قالدیخ.
ارکک قوش حیرصلی گلدی اوتوردو مانیتورون اوستونده دئدی: “سیگارین وار ؟” دئدیم: “یوخ والله چکمم”.
باشلادیخ دانیشیغا، ایشیندن پئشه سیندن سوروشدوم. دئدی الیم بوش دو،نه ائویم وار، نه مسکنیم، بیر بالیغا دؤنموشم کی شوشه ایچینده آغلیر تا گوز یاشیلان یاشیا، بوردا غریب حسابلانیرام،اؤلندن سورا بلکه بیر قبره صاحیب اولدوم سندن هموطن ساییلدیم،نه پارتیم وار پارتیلدیا سوخولام بیر یئره نه پولوم وار ریشوه وئرم پیشیکلره. ال قولوم دا باغلیدی قویموللار اوچاخ. یئدی ایلدی ایستیرم تللی لن ائولنم آمما اولمور، دای عابر قالمییپ منه، مجنون نمه چئکیر من اوندان بترینی چئکمیشم. منه دلی یاکریم دئییللر. کاش بیری منیم حالیمی غریبلر ایمامینا یئتیریدی… ”
بو سوزلر بیر یئل تکی باغیرمداکی آتشه دئییپ، قلبیمی اَلوُو گؤتوردو باشینا.
یاکریمه دئدیم:”من سنین میرزان،دی یازیم یوللویوم ایماما”.

یالغیر،وطن سیز غریب یاکریمدن
آهولار ضامینی،امام رضا جنابلارینین قوللوغونا.
سلام علیکم،
آقا،اگر بو یازیغ الن چاتسا،بیل: قوشلارین حالی خرابدی،اگر سنین حرمینده کی قوشلار کئفه باخیر بیزلر جهنمده یانیریخ.

ایمضا :یاکریم لردن بیری،زنگان محالیندان

یازیجی: محمد قربانی(بیداد زنگانلی)